Perna apruna ita impletur Terentina
Per articulum pernae palum
mittes ita ut cutem a carne separes, ut possit condimentum accipere
per cornulum et uniuersa impleatur. Teres piper, bacam lauri,
rutam; si uolueris, laser adicies, liquamen optimum, caroenum
et olei uiridis guttas. Cum impleta fuerit, constringitur illa
pars, qua impleta est, ex lino et mittitur in zemam. Elixatur
in aqua marina cum lauri turionibus et anetho.